بیر تصویر - بیر دنیز سؤز : ائوین دادی - دوزو

ائوین, دادی, - دوزو,

دونیالری یارادان بؤیوک تانری نین بوتون ایشلری حساب کیتاب اوزو ایله دیر و آداملاری یاراتماقدادا بیر پارا هدفلری واردیر کی بیز اونلارین هامیسین بیلمه ییریک و بیزیم اونون هامی سیررلریندن باش چیخارتماغیمیز مومکونسوزدور. آنجاق یالنیز بونو دویوروق کی تانری ، دونیانی یاراداندان سونرا چالیشیر چکدیگی زحمتلر بهره سیز قالماسین، مثال اوچون : آداملارین آراسیندا ائوله نیب اوشاق دونیایا گتیرمه گی خوشلاییبدیر. دئمه ک اولار بئله بیر داورانیش ایله ، بؤیوک تانری نین هدفی نین داوام تاپماسین آلقیشلاییریق . ائله بیل کی بیز ائوله نیب اوشاق دونیایا گتیره نده بیر باخیمدان، تانری نین باخیشین و سئوگی سین اؤزوموز اوچون داهادا چوخالدیریق ، چونکی اونون دا ایسته گی ، آداملارین نسلی نین آردیسی و داوام تاپماسی دیر. او قیز اوغلان ایچینده ائولنمه ک اوچون سئوگی ( محبّت ) یارادیبدیر تا بو یارانیشدا کی چالیشماقلاری نین ثمره سی داوام تاپسین. اودور کی ایسلام پیغمبری ، حضرت محمد (ص) بویورور: ائولنمه ک دینین یاریسی دیر.

اوشاق دونیایا گلندن سونرا ، سئوگی ( محبّت ) ، یاشاییشدا داهادا آرتیر و همین تانری وئره ن سئوگی دیر کی بیزده اوشاغا نسبت یئنی دویغو یارادیر. اوشاق، تانری طرفیندن بیزده امانت کیمی ساییلیر. هر کیم اوشاغین یاخشی بؤیودوب و اونا یاخشی اخلاق نیشان وئریب ، ایسته ک گؤرستسه تانری یانیندا عزیز ساییلار. دئمه ک لازیم گؤرونور کی، اوشاق آتاسی یالنیز ائشیکده ایشله ییب ، اوشاغین یئمه ک ایچمه گین گتیرمه گه کیفایتلنمه ییب ، اونون باشقا ایستکلرینه ده باش قوشوب ، اونا ائو ایچینده محبّت ائتمه لی دیر.

امام صادق (ع) حضرتلریندن روایت دیر کی :

اوشاقلار آتا آنا دان ایسته ک و سئوگی گؤرمه گی سئوه رلر و قیز اوشاغی نین لاپ چوخ ، آتا آنا طریفندن ایسته ک و عشقین اولماغینا باغلیلیغی واردیر. آمما یاددان چیخارتمایاق کی آنانین دا سئوگیسی اوشاقا خاطیر حسابا گلمییه ندیر و اونا گؤره دیر کی عزیز پیغمبریمیز جنّتی آنانین آیاغی آلتیندا گؤرور.

مقدّس قرآن کیتابیندا ، آنانین اوشاغینا عشق باغلاماغیندان سؤز آچیلیبدیر و تانری آنادا خاص بیر محبّتین اولماغین داستان کیمی بیان ائدیب خاطیرلادیر...

اوشاق ، قفس ایچینده قالان قوش کیمی بیر زاددیر کی آتا آنا قانادی آلتیندا کؤلگه له نیبدیر. خوش دیندیرسن گوله جکدیر ، آجیقلانسان آغلایاجاقدیر. سوت وئرسن ایچه جکدیر ، وئرمه سن آغلایاجاقدیر. یئمه ک وئرسن یییه جکدیر ، وئرمه سن آغلایاجاقدیر... بیز اؤزوموز اوشاق اولساق سئوه ریک بیز ایله نئجه گئچینسینلر؟ ، بیزده اوشاقیمیز ایله اوجور اولاق .

آنجاق اوشاق ائوین دادی دوزودور . و اوشاق اوچون آتا آنانین محبّتی و بو محبّت دن دادلانمالاری تانری نعمتلریندندیر و بو بؤیوک نعمته گؤره تانری اؤنونده دیزه چؤکوب اوندان تشککور ائتمه ک بیزیم بوینوموزدا بیر حق ساییلیر. اوشاقلاریمیزا ائوده محبّت ائتسه ک و اونلاری اؤز ایستی نفسیمیز ایله ، قوینوموزدا آلقیشلاساق، تانری بیزی سئوه ر. اوشاق ایله اویناماق و اوشاقا محبّت ائتمه ک ، عبادت کیمی ساییلیر. قدیم دن دئییبلر کی : اوشاق اولان ائوده غیبت اولماز ، چونکی اونیله اویناماغا باش قاریشار و داها آیری سؤز دانیشماغا واخت قالماز . و دئییبلر: اوشاق ائوین دیره گی دیر، چونکی اوشاقلی ائوده یاشاییشین داوامی آرتار و ائوین داغیلماغی نین قاباغی آلینار ...

بؤیوک تانری دان بو وئردیگی نعمتلره گؤره تشککور ائدیریک و ایسته ییریک بیزی گوناهلاردان - خیانتلردن اوزاقلادارکن، باشقا نعمتلریندن ده وارلاندیرسین.

یازان: الف. عظیمی بیلوردی ( دادا بیلوردی )