ده زلال پند ترکی - سبک زلال - دادا بیلوردی

91- درمان

*

درده درمان ایسته رم

جان وئریب سندن گئنه جان ایسته رم

دونیانی سنلن ده ییشمه م،عشقی سنسیز دینله مَم

کؤنلومی وصلین اوچون قان ایسته رم

نفسی قوربان ایسته رم

*

92- جان

*

دور منه جاندان دانیش!

قلبیوه وئـر تاققا بیــر قاندان دانیش!

سؤز دوشه نده شرم دن غئیرتدن، عمداً یوخلاما!

هئچ نه دن یوخ،بلکه اینساندان دانیش!

درده درماندان دانیش!

*

93- قول

*

قُول وئردین بیر کسه

قویما تا قولون آلان سندن کوسه

ایسته سه بارلی بولودلاری یئتیرسین گولشنه،

یئل گره کدیر بو ایشه پیدر اَسه،

هر نه مانع دیر کَسه

*

94- دؤزوم

*

داش یولا باشماق گره ک

آخماقا کهریز کیمی داشماق گره ک

موشگولـون آنجاق تلنبار و اوجـا داغ اولسادا

دالغا تک داشدان داشا آشماق گره ک

قایناییب داشماق گره ک

*

95- معتاد

*

اولدو معتاد عندلیب

یورقون آرغین گؤرنه سرگردان گلیب

سَس فدا، قامت فدا، غیرت مریض، ایمان غریب،

بیر دومانلی شهر و رؤیایه گیریب

وئرمیش اؤز جانین فریب

*

96- دوزلوک

*

ایسته دیم کؤز اولماسین

کؤزلـر ایچـره بـد نظر گـؤز اولماسین

دئرلرحق چوخ زهر،باطل چوخ شیریندیر بال تک

هئچ گؤروم بو اَیری سؤز دوز اولماسین

دوزلوگوم سؤز اولماسین

*

97- سلام

*

حق بولاغیندان سو ایچ!

حـق دانان یئـردن تنفّر ائیله کؤچ

بومَثل دیر« بی حیایه تئز سلام وئر کئچگیله »

یاخشی بو امّا سلام دا وئـرمه هئچ

دؤنده ریب اوز باخما کئچ!

*

98- یئر کوره سی

*

بوردا هر کیمسه یاشیـر

شؤهـرتـه حددیندن آرتیـق دیـرماشیـر

گاه ساواددان،گاه مال دان،گاه اؤزوندن دَم ووروب

بیلمیره م چوخلار نه دن مغرورلاشیر

آرتمامیش قاینیب داشیر

*

99- قیزیشماق

*

عشق دادیندن چیخار

اونـدا کی صحبت نهادیندن چیخار

سؤز قیزیشدیقجا دوشه ر بیـر شخص آلله یادینه

باشقا بیر شخصین ده یادیندن چیخار

اعتقـادیـندن چیخــار

*

100- سؤز

*

بوش اؤتورمه کؤنلونی

دیل اوجاغیندان گؤتورمه کؤنلونی

سؤز قیزیشدیقجا سنی تحویل دای آلدیقجا بیـز

«من»دییه ن جانه یئتیرمه کؤنلونی

تئـز ایتیرمه کؤنلونی

دادا بیلوردی

تورکجه ادبیات صحیفه سی...